Vjekoslava

bili bronzin

bili bronzin
izbužan i glibon iškrapjan
vas škorcan
stoji na dnu skal

višje ga niko ne triba
ka unda ka smo iz njeg pili vina
ka unda ka nan je sladija grlo
poza suše u justima
jol poza gorčine u duši

višje ga niko ne triba
niko se na nj ne obazire
ka ja,
ča uvik o niki tajni spominjanja
drćen.

U staro barilo di voda ni mogla višje stat
nit se moglo točit vino, niti trudna noga oprat
sakrila moja baba o' sto grija: žmul
i tobože škovac ić bacit
iz grlića znala je justa zalivat
pa krišon i polako
traveršon ji otrat.

-

nesritni čovik

...je da san te sluša
da san mater posluša
da san rič ikoju obadava
jol marija za besidu
jol vidit lišce njojzi tija
undak
da san bar se obazrija
ka san iša ća.
-

Sidila bi na bunaru
malešnin nogan zibjajuć po vodi
i dok bi se sunce nizdol
proma Italji okrićalo
moj bi did
spušća raminu o japnja
i bronzin o galice na brazdu zemje.

Nisan znala kako reć, kako molit
ka naš svit ka' vapi Boga
pa bi pomislila u svom malon oku
"Dragi Bogo, ka' bi te barenko još sutra bilo
sve ča je moj did zasadija
jušto bi lipo u zemju silo".
-

....i ne more se vratit
ne more stat, nema mista
sve ka tisno
ušlo u se.

Dikod i u dušu žene
sputi se nebo u more.

.....i ni da ne moreš
neg' višje i ne smiš.

Škabrnja

Govoridu dite si samo doklen je i mater živa,
pozatin nima nikog da te tako zove, da te takin gleda.
A njon je zvir o' čovika nožon grudi para
prid kućon o goruće stine,
ka' je crni šudar
zanji put rukon stegla.
More bit da se sunce i nadaje nizdol okriće
da kosovi pivaju i bajame cvitaju
a tepli vitrić s prigatorja diri.....

Stisni se draga dušo moja
sada znadeš ča je ta
i di je ta
zemja tvoja 'rvacka.
_


Mome didu

mojemu je didu bila dobro znana
ona oltarska tišina
ka špag privezan za oblak
ka pripravjen put odlaska

i on je tega dana
kraj ponistre zanji put potega lulu
pogleda još jednon niza škoj
i sa zvizdama u jočima
protega se po posteji.

_


Te večeri
pivali su cvrčki
vonjala trava i ševar
te večeri
drača i djeran
sve me ništo zvalo u noć
jerbo se misec na ne bu caklija
ka' gvantjera u veltrini
(ča su je svitlali, luštrali
svin šaldamin i sidolin).

_

S kampanela
ura
breca,

inaće posvuda oko mene
sama je tišina.

_

Bože srce mi sred polja
nježnosti gaze....

....a sav moj posjed
nije trajniji
od uzdaha.

[Edit by admin]